
遍知贝玛嘎波大师教言集PK172ལོ་མཇུག་བསྡུ་བའི་གཏམ།
17-1
༄༅། །ལོ་མཇུག་བསྡུ་བའི་གཏམ།
༄། །གླེང་སློང་བའི་མཆིད།
༈ ལོ་མཇུག་བསྡུ་བའི་གཏམ།།། །། གླེང་སློང་བའི་མཆིད། འདི་ལོར། བདག་ལ་ལུས་རྟེན་སྦྱིན་པའི་དྲིན་ཆེན་ཨ་མ་ཡུན་རིང་ཉལ་སར་ལྷུང་བས། ལན་གཅིག་འཕྲད་པའི་རེ་བས་དཔེ་ཁྲིད་ཀྱི་འཕྲོ་བཤོལ་
དགོས་བྱུང་བ་དང་། ལོ་ངོ་གཅིག་ལ་ལྷན་དུ་སྐྱེས་ཤིང་། སླད་མེད་བྱིས་སེམས་དང་མོའི་ངུ་དགོད་ཁྲོད། མཉམ་དུ་འཚར་ལོན་བྱུང་བའི་ཕ་སྤུན་གྱི་ཤ་ཉེ་རྐྱེན་ལམ་དུ་ཤོར་ནས་གཏན་བྲལ་སོང་
ཞིང་། དེས་མི་ཚད་མི་ལོ་དགུ་ལ་དབུ་ཕལ་རྣམ་འགྲེལ་གྱི་གཞུང་ལུགས་ཁག་ལ་གཞན་དྲིང་མི་འཇོག་པའི་ཞིབ་བཤད་བསྩལ་བས། བཀའ་དྲིན་འགྲན་ཟླ་བྲལ་བའི་རྒན་རིན་པོ་ཆེ། ཡོངས་ཀྱི་དགེ་བའི་
བཤེས་གཉེན་དམ་པ་གང་དེ་དགོངས་པ་ཞི་དབྱིངས་སུ་ཐིམས་པ་སོགས། ལོ་འདི་ང་ལ་མཚོན་ལ་ལོ་ནག་ཅིག་ཡིན། དེའི་དབང་གིས་བསེ་རུའི་བརྟུལ་ཞུགས་ལ་ཤིན་ཏུ་མོས་པ་ཞིག་ཏུ་གྱུར། འོན་
ཀྱང་གནས་དུས་གང་ལ་ཐུག་ཀྱང་། རང་འགར་མི་འདུག་པའི་གཤིས་ཀ་ཤིག་མཆིས་པས། དཔེ་ཀློག་དང་གནས་སྐོར། དཔེ་སྒྲིག་སོགས་གླེང་རིན་མེད་ཀྱང་རང་སེམས་གསོ་བྱེད་འགའ་རེ་ཡོད་པ་ལས། ཀུན་མཁྱེན་
པདྨ་དཀར་པོའི་གསུང་འབུམ་ཡིག་རྐྱང་ཚང་སྒྲིག་ཞུས་པ་འདི་དེ་དག་ཁྲོད་ཀྱི་གཅིག་ཡིན།། །།
༄། །གཅིག །ཐོག་མའི་ཀུན་སློང་།
གཅིག །ཐོག་མའི་ཀུན་སློང་། དྲ་བའི་དུས་རབས་འདིར། གཞུང་ལུགས་ཁག་དྲ་ཐོག་ཏུ་སླེབས་པ་ཙམ་གྱིས་འགྲིག་པ་མིན་མོད། 
17-2
དྲ་བའི་བཞུར་རྒྱུན་དང་འགྲོག་མ་ཐུབ་ན། འཕོ་འབྱུར་ཤིན་ཏུ་སྐྱེན་པའི་དུས་རབས་འདིར། རིག་གནས་མང་པོ་ཞིག་འཕེལ་རྒྱས་འགྲོ་མི་ཐུབ་པ་ནི་ཤིན་ཏུ་གསལ་པོར་གྱུར་ཡོད། དེས་ན། ༧དཔལ་རྒྱལ་
བའི་དབང་པོ་ཀརྨ་པའི་བཀའ་དྲིན་གྱིས། བཀའ་བསྟན་ཁག་མང་པོ་ཞིག་ཚད་མཐོན་པོའི་ཐོག་དྲ་ལམ་དང་སྙི་ཆས་བརྒྱུད་བདེ་གླག་ཏུ་ལྟ་ཀློག་ཐུབ་པ་འདི་ནི། བཀའ་བསྟན་ཤེས་རིག་གི་ལོ་རྒྱུས་
ཁྲོད་ཀྱི་དཀྱོག་མཚམས་གལ་ཆེན་ཞིག་ཡིན་པ་སྨོས་མི་དགོས། འདིས་རང་རེའི་ཆོས་རིག་ལ་རེ་བའི་འོད་སྣང་གསར་པ་ཞིག་སྩལ་བ་དང་ལྷན་དུ། ཁོ་བོར་རེ་བ་ལྷག་མ་ཞིག་བྱུང་བ་ནི།
རང་རེ་བཀའ་བརྒྱུད་པའི་ཡིག་ཆ་ཁག་ཀྱང་འདི་ལྟ་བུ་ལྟ་ཀློག་ཐུབ་པ་ཞིག་བྱུང་ན་སྙམ་པ་དེ་ཡིན། བཀའ་བརྒྱུད་པའི་མཁས་གྲུབ་ཁྲོད་ན། བདེ་བར་གཤེགས་པ་དགེ་བཤེས་ཁམས་པ་དང་། ཀུན་
མཁྱེད་རང་བྱུང་ཆེན་པོ། འགོས་ལོ། འབའ་ར་བ་ལྟ་བུའི་མཁས་པའི་བཞུང་ལུགས་དང་། སྒྲ་བསྒྱུར་གྱི་རྒྱལ་པོ་དང་། རྗེ་བཙུན་ཆེན་པོ། མཉམ་མེད་དྭགས་པོ། འཇིག་རྟེན་གསུམ་མགོན། ལོ་རྒོད་ཡང་དགོངས་སོགས་
ཀྱི་མན་ངག་གི་གླེགས་བམ་བགྲང་ལས་འདས་མོད། ད་ལྟ་རང་རེ་ཕལ་མོ་ཆེའི་འཇུགས་ངོགས་གལ་ཆེ་ཤོས་ཀུན་མཁྱེན་རྣམ་གསུམ་གྱི་གཞུང་ལ་བྱེད་པར་སྣང་བས་དགོས་མཁོ་ལྷག་པར་ཆེ་མོད། དེ་ལས་ཀུན་མཁྱེན་མི་སྐྱོད་རྡོ་རྗེའི་གཞུང་ནི་རིང་མིན་ཐོན་ངེས་སུ་སྣང་ཞིང་། 
17-3
གཞན་གཉིས་འདིས་བྱེད་སྙམ་པ་མ་མཐོང་ནས། རང་གི་ཁ་སྟབས་ལ་མི་འཚམས་པའི་ཁུར་འདི་ཨུ་ཚུགས་འབའ་ཞིག་གིས་བླངས་སོ།། །།
༄། །གཉིས། ཟུར་ངོས་གཞན་ནས་མཇལ་བ།
གཉིས། ཟུར་ངོས་གཞན་ནས་མཇལ་བ། ཀུན་མཁྱེན་མི་ཕམ་པདྨ་དཀར་པོ་
ནི། ཕག་གྲུའི་སྲིད་དབང་གི་མཇུག་དང་། གཙང་པའི་སྲིད་དབང་འཛུགས་བཞིན་པའི་སྐབས་སུ་བྱོན་པའི་བཀའ་བརྒྱུད་པའི་མཁས་གྲུབ་ཆེན་པོ་ཞིག་ཡིན་པར་མ་ཟད། དུས་དེར་འགྲན་པའི་ཟླ་དང་བྲལ་བའི་བོད་
གངས་ཅན་པའི་མཁས་པ་ཆེན་པོ་ཞིག་ཀྱང་ཡིན། དེར་མ་ཟད་ཁོང་གི་རང་རྣམ་སོགས་ན། དུས་དེའི་བོད་ཀྱི་ལོ་རྒྱུས་གཞན་དུ་མི་གསལ་བ་ཤིན་ཏུ་མངས་པོ་ཞིག་གསར་བར་འཁོད་འདུག་པས་
དཔེ་ཆ་དེ་དག་བོད་སྤྱིའི་ལོ་རྒྱུས་ཀྱི་དབང་དུ་བྱས་ཀྱང་གལ་ཆེན་དུ་མཐོང་། དེ་བཞིན་ཀུན་མཁྱེན་གྱི་བརྒྱུད་ཡིག །གསན་ཡིག །དཔེ་ཐོ། དཔེ་རྫི་སོགས་ནི། ཆོས་ཀྱི་བརྒྱུད་པའི་ཁུངས་དང་། མན་ངག་
དག་མ་དག་གསལ་བར་སྟོན་པའི་འཕྲུལ་གྱི་མེ་ལོང་ལྟ་བུར་མཇལ། རྗེ་འབྲི་ཁུང་པས། འགའ་ཞིག་ནི་ཆོས་རྒྱུད་པ་མེད་པར་འབྱུང་བ་དང་། ས་ཆོས། གནམ་ཆོས། གཏེར་མ་ལ་སོགས་པ་ཟབ་ཅིང་
ངོ་མཚར་བར་འདོད་པ་ཡིན་མོད་ཀྱི། འདིར་ནི་རྒྱུད་པ་ལས་བརྒྱུད་པའི་ཆོས་ཟབ་ཅིང་ངོ་མཚར་བར་བཞེད་དོ། །ཞེས་སྩལ་བ་བཞིན། དེ་དག་བསྟན་པ་དམ་པའི་ཆོས་དང་། ཀུན་མཁྱེན་ཆེན་པོའི་རྣམ་ཐར་གཉིས་ཀར་གལ་འགང་ཧ་ཅང་ཆེ་བར་སྣང་མོད། 
17-4
དེ་དག་ཕལ་ཆེ་བ་འབྲུག་པའི་ཆོས་མཛོད་ནང་དུ་བཞུགས་སུ་གསོལ་ཨེ་ཡོད་ན་བསམ་པའི་པ་ཞིག་འདུག།། །།
༄། །གསུམ། དངོས་གཞི་ལག་བདར་བ།
གསུམ། དངོས་གཞི་ལག་བདར་བ། དེ་བས་ན། སྔོན་གྱི་རེ་བ་ལྟར་ཕྱི་ཟླ་དྲུག་པའི་
མགོ་སྟོད་ནས་མ་དཔེ་བཙལ་བས། གནམ་འབྲུག་གི་དཔེ་རྙིང་པོད་བཅུ་བཞིའི་བདག་ཉིད་ཅན་དང་། ཕྱིས་༡༩༧༥ ལོ་ཙམ་དུ་བྲིས་ཤིང་འཕྲུལ་པར་བཏབ་པ་གཉིས་ལས། ཕྱི་བ་དེ་སྔར་གྱི་པར་མའི་ཐོག །
ལྷོག་འབྲུག་ནས་རྙེད་པས་ཁ་བཀང་བ་ཡིན་འདུག་པས། དེ་ཉིད་ཅུང་ཆ་ཚང་བར་མཇལ་ནས། དེའི་དཀར་ཆག་ལྟར། པོད་སོ་སོའི་ཆོས་ཚན་དག་ཐོར་བཀོད་དེ། ཡིག་རྐྱང་ཕབ་ལེན་དང་རྩད་འཚོལ་ཞུས་
མོད། ཆོས་ཚན་ཞེ་ལྔ་ཙམ་མི་ཚང་ཞིང་། ཤོག་ལྡེབ་དགུ་བརྒྱ་ལ་ཉེ་བ་ཞིག་ཡིག་བཏག་བྱེད་དགོས་པར་མཐོང་བས། སེམས་ཁོང་དུ་ཆུད་པར་གྱུར་ཅིང་། རེ་ཞིག་དཔེ་ཀློག་དང་གནས་སྐོར་སོགས་ཀྱིས་
དུས་འདས། འོན་ཀྱང་༢༠༢༣/ ༡༡/ ཚེ་ཤར་ལ་བླ་མ་དཔལ་ལྡན་དང་མཇལ་ཞིང་། ཁོང་གིས་ལེགས་སྒྲིག་ཐུབ་ན་ཀུན་གསལ་མེ་ལོང་ནང་དུ་འཇུག་ཆོག་པའི་ཞལ་བཞེས་ཐོབ་པ་དང་། གཞན་ཡང་། དཀའ་ཚེགས་
ཆེ་ཡང་ཅུང་མྱུར་བའི་ཡིག་འཇུག་གི་ཐབས་ལམ་གཞན་ཞིག་ཀྱང་རྙེད་པས། སླར་ཡང་སྔར་གྱི་ཐོ་ཡིག་ལྟར་ལེགས་བསྒྲིགས་ཀྱི་མགོ་བརྩམས། ཟླ་བ་གསུམ་གྱི་ཡུན་ལ་བློ་རྩེ་གཅིག་བསྒྲིམས་གྱིས་འབད་པའི་འབྲས་བུར་ད་གཟོད་ཆ་ཚང་བ་ཞིག་གྲུབ་པ་ཡིན་ནོ།། །།
17-5
༄། །བཞི། བསྒྲིག་སྟངས་ཟུར་ཙམ།
བཞི། བསྒྲིག་སྟངས་ཟུར་ཙམ། བསྒྲིག་སྟངས་ནང་བསྟན་དྲ་མཛོད་ནས་ཕམ་ལེན་ཞུས་པ་རྣམས་ནི། འབྲུག་མཛོད་དུ་འཁོད་པ་དག་ཟུར་བཀོལ་གྱི་གསུང་འབུམ་དུ་བསྒྲིགས་པར་སྣང་བས། དེ་ཉིད་མ་རྩ་བྱས་ཐོག །
ཚིག་རིས་འགའ་དང་། གཟུངས་སྔགས་མང་པོ་ཞིག་འཐོར་ཡོད་པ་དཔེར་ན། རྟུལ། ལྷམ། སྟྭཾ། ཊྭཱཾ། ཧཱུཾ། ཧྲི། ཧྲཱི། ༴ ྅། ཉྫཱ། ཥཱཉྩ། ཙཎྜ། པཎྜིཏ། བཛྲ། སོགས་ངོས་མི་ཟིན་པའི་ཚོད་དུ་འཁྲུགས་ཡོད་པ་མཐའ་ཡས་
པ་དང་། དགོས་མེད་ཀྱི་ཨང་རྟགས་སོགས་ཤིན་ཏུ་མངས་པོ་ཞིག་གཙང་བཟོས་བྱས་ཏེ། ཐ་ན་ཚེག་གཅིག་ཚུན་ཆུད་ཆད་ལྷག་མེད་པ་ཞིག་ཏུ་འབད་ཁུལ་བྱས་ཡོད། དེ་བཞིན་གསར་དུ་ཡིག་འཇུག་བྱས་
པ། རང་རྣམ་ཐུགས་རྗེ་ཆེན་པོའི་ཟློས་གར་གཙོས་པའི་ཆོས་ཚན་ཞེ་ལྔ། ལྡེབ་མ་དགུ་བརྒྱ་ལ་ཉེ་བ་ཞིག་ཡིག་རྐྱང་གསར་དུ་བཏག་ཤིང་། མ་མཐའ་ཡང་། མ་དཔེ་དང་བསྡུར་ཞུས་ལན་གཉིས་རེ་
ངེས་པར་འགྲོ་བ་ཞུས་ཡོད། འོན་ཏང་། གཅིག་ནས་ཁོ་བོ་མཐུན་སྐྱེན་ཞན་པ་དང་། གཉིས་ནས་གློག་རྡུལ་རྩིས་འཕྲུལ་ལ་ཆེད་སྦྱོང་བྱེད་མ་མྱོང་བ་དང་། གསུམ་ནས་མ་དཔེ་ལ་ཡང་དོགས་པ་ཡོད་
ས་མང་ཞིང་། གནམ་འབྲུག་གི་པར་མ་ལ་སྣག་ལོག་ཤོར་ས་མང་བ་སོགས་དང་། དཀྱིལ་ཆོག་དབྱངས་ཡིག་སོགས་ལ་སྦྱངས་པ་ཞན་པས། ཅིས་ཀྱང་ནོར་འཁྲུལ་མང་ངེས་མོད། དྲ་ལམ་དུ་མ་རྩ་ཆ་ཚང་ཞིག་ཡོད་ན། 
17-6
ཤོག་ཐོག་ཏུ་བཀོད་པ་དང་མི་འདྲ་བར། རིམ་པས་ལེགས་བཅོས་ཁ་སྣོན་ཞུ་ཆོག་པར་བསམ། སྤོབས་པ་བསྐྱེད་ནས་ཞུ་སྒྲིག་བྱས་པ་ལགས། ནོར་བ་གང་མཆིས་རྣག་ཐོག་ཙག་འཁེལ་གྱིས་བླང་དོར་ལམ་
སྟོན་ཡོད་པར་ཞུ་བ་དང་སྦྲག །མ་འོངས་ཉེ་བའི་ལོ་ཟླའི་ནང་དུ། བསྒྲིག་སྟངས་དེ་དེ་འདྲ་མ་རེད། འདི་འདྲ་དགོས་པ་ཡིན་ཞེས། འདི་ལས་སྤུས་ལེགས་པའི་སྒྲིག་མཁན་མང་དུ་འབྱུང་བའི་རེ་
བ་དང་སྨོན་འདུན་ཡང་ཞུ་བཞིན་ཡོད་དོ།། །།
༄། །བཀའ་དྲིན་ཚོར་བའི་ཕྱག།
བཀའ་དྲིན་ཚོར་བའི་ཕྱག ། ཐོག་མར། ཀུན་གསལ་མེ་ལོང་གི་སྲོལ་འབྱེད་པ་༧ དཔལ་རྒྱལ་བའི་དབང་པོ་ཀརྨ་པ་མཆོག་ལ་གུས་ཕྲག་སྔོན་ཏུ་བཏང་ནས།
རང་རེའི་ཆོས་རིག་སྤྱི་དང་བྱེ་བྲག་ལ་རེ་བའི་འོད་སྣང་སྩལ་མཛད་པར་བཀའ་དྲིན་ཆེ་ཞུས་བ་དང་། དེ་བཞིན་མ་དཔེ་དང་ཡིག་རྐྱང་མང་པོ་ཕབ་ལེན་ཞུ་ས། ནང་བསྟན་དཔེ་ཚོགས་ལྟེ་
གནས་དང་། ལས་དོན་འདི་སྒྲུབ་པར་སེམས་ཤུགས་སྩལ་མཁན་བླ་མ་དཔལ་ལྡན་མཆོག་དང་། གློག་རྡུལ་རྩིས་འཕྲུལ་གནང་མཁན་ཤ་ཉེ་ཆོས་ཉིད་རྡོ་རྗེ་དང་། ཟས་གོས་གནས་མལ་སྦྱར་མཁན་ནང་མི་དང་སྤུན་
མཆེད་རྣམས་པའི་བཀའ་དྲིན་ལས། བསྒྲུབ་བསམ་པའི་ལས་དོན་འདི་གྲུབ་པ་ཡིན་པས། ཁོང་རྣམ་པར་སྙིང་ནས་བཀའ་དྲིན་ཆེ་ཞུས་པ་ལགས། དེ་མཚུངས་དཔེ་བསྡུར་ཞུ་དུས། མ་དཔེ་ཀློག་མཁན་མེད་པར་བྱ་ཐབས་བྲལ་བས། 
17-7
བདག་གི་ཆོས་གྲོགས་བཟང་པོ་ཟུར་མང་བརྩོན་འགྲུས་རྒྱ་མཚོས། ལམ་ཐག་དང་། དུས་ཚོད། དཀའ་ལས་སོགས་གང་ལའང་མ་འཛེམས་པར། ཟླ་བ་གཅིག་ལྷག་གི་དུས་ཡུན་ནང་། གསར་བཏག་ཆོས་ཚན་ཕལ་མོ་ཆེ་
ཞིག་གི་མ་དཔེ་ཀློག་རོགས་མཛད་པར་བཀའ་དྲིན་ཤིན་ཏུ་ཆེ་བ་བྱུང་ཞིང་། གོ་འཇོ་ནུབ་དགོན་བླ་མ་འཕྲིན་ལས་ཀུན་ཁྱབ་མཆོག་གིས་ཐུགས་ཁུར་འོག །ཁོང་གི་ཚ་བོ་གླིང་སྲས་མཆོག་གིས་མ་
དཔེ་འཚོལ་ཞིབ་ཐད་ཕྱག་རོགས་དཔེ་མེད་གནང་དང་གནང་མུས་དང་། གྲོགས་པོ་འབའ་པ་ཐང་ནག་གིས་རང་རྣམ་སོགས་ཆོས་ཚན་འགའ་ཞིག་གི་མ་དཔེ་གཟིགས་པར་ཆུ་ཚོད་མང་པོ་བཏང་བ་དང་། གཞན་
ཡང་དེའི་ཐད་ཕྱག་རོགས་གནང་མཁན་ཡོངས་ལ་བཀའ་དྲིན་ཆེ་ཞུ་བཞིན་ཡོད་པ་ལགས་སོ། །དགེ་ལེགས་འཕེལ།། །།
༄། །རེ་ཞིག་ངལ་གསོ་བའི་ཚིགས་སུ་བཅད་པ།
གཞན་ལ་མ་རྟེན་ལྟོ་གོས་ཕྱེད་དཀའ་ཡང་།། ཨུ་ཚུཌ་མཁྲེག་པོས་ཡི་གེའི་གཟེབ་དུ་འཚང་།། འབྱོར་
པའི་བྲན་དུ་གྱུར་པའི་སྤྱི་ཚོགས་སུ།། བདག་ནི་ཤོག་སྙིགས་ཟ་བའི་སྲིན་འབུ་ཉིད།། སླར་ཡང་སྲིད་པ་བར་མའི་དུས་ཚིགས་དེར།། རང་འགར་མ་བསྡད་རང་ནུས་གཅིག་དྲིལ་གྱིས།། རྡོ་རྗེའི་གསང་མཛོད་ཀུན་
མཁྱེན་གསུང་འབུམ་གྱི།། ཡིག་ལྡེབ་བདུན་སྟོང་རིམ་གྱིས་བསྒྱུར་བར་བྱས།། པདྨ་དཀར་པོའི་ལེཌ་བཤད་སྦྲང་རྩའི་མཛོད།། གློག་རྡུལ་འཕྲུལ་ལམ་འགོད་པའི་ངལ་བ་ཡིས།། ལུས་ཀྱི་བདེ་ཐང་མིག་གི་རྣོ་དབལ་སོགས།། ཡུན་གྱིས་ཉམས་ཀྱང་ཡིད་ཀྱི་སྤྲོ་སྣང་འཕེལ།། 
17-8
མཁས་པས་དཀའ་སྡུག་ཤེས་ནས་ཅི་དགར་དོར། བླུན་པོས་གླེང་རིན་མེད་པར་མཐོང་བས་བརྙས།། སྤྱང་པོས་ཁེ་ཕན་མེད་པར་ཤེས་པས་གཡོལ།། གླེན་པ་བདག་གིས་ཨུ་ཚུགས་ཁོ་ནས་བསྒྲུབས།། ཞེས་བྱ་བ་ནི་
རེ་ཞིག་ངལ་གསོ་བའི་ཚིགས་སུ་བཅད་པའོ།།


